Крал, дама, џандар е првиот од трите романи на Владимир Набоков со „германска“ тематика, по кој набргу следуваат Камера опскура и Очај. Во вештите преплети на љубовната и криминалната интрига како карти се мешаат судбината на еден успешен деловен човек, неговата жена што се здодева и сиромашниот внук од провинција – сите марионети на случајот, слеп и немилосрден во својот избор.
Младиот Франц оди во престолнината и почнува да работи кај својот далечен и богат чичко, кој го зема под своја закрила, заедно со младата сопруга. Незадоволната и студена Марта набрзо го освојува наивното момче. Нивниот копнеж се разгорува и таа почнува да крои планови како да се ослободат од сопругот, за да можат слободно да уживаат во неговото богатство и во својата љубов. По низата перипетии сенката на смртта навистина се надвиснува над нив – но настаните заземаат неочекувана насока...
Владимир Владимирович Набоков (22 април 1899–2 јули 1977), е руско-американски писател, преведувач и новинар. Роден е во Санкт Петербург, во богато аристократско семејство. Набоков стекнал светска слава со романот Лолита (1955), чиј успех му овозможил да се врати во Европа и да му се посвети на пишувањето. Заедно со жена му се преселил во Монтре, Швајцарија, каде што останал сè до својата смрт. Пишувал на руски и на англиски јазик. Автор е на многу романи, кратки раскази, песни и драми, кои ги преведувал со помош на својот син.
ПовеќеВеб страницата користи колачиња за да ви овозможиме најдобро можно корисничко искуство. Со продолжување на користењето на нашата интернет страница ја прифаќате употребата на колачиња (cookies).
Се согласувам